In t Dagblad lees je geregeld berichten over diskriminoatsie en rasisme. Loat ik veurop stellen dat ik gain rasist bin, mor d’argumenten dij aanvoerd worden om aine as rasist te bestìmpeln stoan mie aal meer tegen. Woarom? Der binnen lu dij mie, zunder dat ze mie kinnen, n rasist vinden.

t Is onbegriepelk wel vandoag de dag as rasist bestìmpeld wordt en woarom. Sommegen vinden joe al n rasist as je vrouger indioantje speuld hebben. En as je ooit ais in joen leven mit n knappertjespistooltje swaaid hebben omdat je Rooie Roggers noadoun wollen, wor je deur sommegen aan de schaandpoale noageld.

As je zokswat tegenwoordeg op n verjoardag smeueg en beeldend vertellen mag je hopen dat gain van d’aanwezegen onder t slachten van heur roomhoorn stiekem even n notietsie moaken van joen jeugdherinnern.

Ik denk dat, as onze soamenleven drift op cancelcultuur en woke idioten, je d’echte rasisten in de koarde speulen. d’Opkomst van extreem rechtsen, populisten en ultra linksen voart ter wel bie. Din stoan op termien zulfs de normoalste en nait rasistische mìnsen op om goandeweg de verkeerden aan de macht te helpen. Der binnen veurbeelden zat.

Mor as je dit deur ideologische blindhaid nait in de goaten hebben deurdat je realistische en analytische kompetentsies missen bin je veroorzoaker van n groot perbleem. In wezen bin je din verantwoordelk veur de gevolgen. Denk doarbie aan n “strontstörm” via social media en t uutsloeten van dailnoame aan t sosioale leven.

De zogenoamde schrapkultuur laaidt tot verdaarvelke en gevoarleke uutwazzen. Gainaine duurft nog ironisch te wezen of n bak te vertellen. As je zeggen dat Joyce guster zo swaart was as n Turk wor je biekans vogelvrij verkloard. En wat mout je mit de scheldnoam “törken” van de bewoners van Den Andel en Finnewol?

t Liekt ter op dat ter aal meer gemankeerde twijbainegen op dizze wereld rondlopen. Lu dij nait meer waiten dat de kerke van oldsheer midden in t dörp staait. Dij elk moal weer n nij swien vinden om deur t dörp te joagen.

Beschuldeg nait de normoal denkenden. Je maggen d’handen dichtkniepen dat dij nog denken en veuraal kritisch denken. Goa ais bie joezulf te roade of je zulf wel realistisch normoal denken. t Is elk moal weer n verrazzen wel je as beroepskloagers en duurverongeliekten weer op de körrel nemen.

Bie “verrazzen” vergat ik tiedens t typen de letter “r”. “Verazzen”, dus. Mor ja: verstreuen is wel t allerleste.

Ach, duurf joezulf te wezen en blief laggen……..