t Begunt ter aal meer op te lieken lu, dat de Europeze Corona-app op körde termien op alle smartphones installeerd worden kin. Of t n “must” wordt? Dat zol mie niks verboazen. t Mout in elks geval n technisch hoogstandje wezen.

In d’eerste ploatse kin je aanteunen dat je bievubbeld Pfizerizeerd, Astraeerd of Modernizeerd binnen. Mor dij app detekteert ook of je in de buurt wèst binnen van n virusbezitter. Boetendes geft e deur of je joe wel aan de regels holden. En hai kin zulfs aan joen stem heuren of je wel of nait besmet binnen. Wellicht herkent e nou net nait dat ter tussen joe en n Coronaslachtovver gain anderhaalve meter zat mor HR++-glas.

Der wordt vast avverteerd mit: “Gezondhaid gaait boven privacy”. t Installeren van dij app is nait verpicht, zeggen ze. Mor t zol mie niks verboazen dat, as je de app nait installeren, je verplicht joen aigen lockdown oplegd kriegen.

t Duurt vast ook nait laank meer of der komt n Coronachip in de handel. Dat is n pokkelchip dij onderhoeds injekteerd wordt. Dij pokkelchips binnen al joarenlaank gangboar bie honden en aandere vaarpoters. n Verplichte tracker in alle auto’s is doarnoa netuurlek de volgende stap. Tja, de wereld hangt zo stoadegaan van Appies aan mekoar.

Mien ol opoe kon mor ain Eppie. Dat was Elektrisch Eppie woar zai doudestieds heur dreugkabbe mit moderne krulset kochde. t Was volgens mie n Carmen 18, zo’n langwaarpeg plastic deuske mit n rooske derop. Zai haar hom kocht op aandringen van mien opa. Zai hadden de knientjesdoagen al laank achter de rogge dou mien opa touvalleg achter t glas bie elektrisch Eppie n rekloamebred zag: “Become a new woman in 10 minutes”. Dat leek hom wel wat. n Grammefoonspeuler, n centrifuge en n swaartwit televizie waren zien loatere aankopen bie Electrisch Eppie.

Ik heb mien aigen “app”, n mobiele en sproakgestuurd. t Kost n poar sìnten, mor din hejje ook wat. Dij stekt heur vuilhoorntjes aaltied meroakel goud uut.

Veuraal as zai noast mie in d’auto zit……….