RSS

Veur die ook, Siene

08 Okt

Eltje Doddema

Veurege week zaten Derkie en ik in n hounderrestaurant. Wie hadden n advertìnsie in t Bokkeblad lezen van n restaurant woarvan mit dikke vedde letters d’houndergerechten aanprezen wuiren. En dou der ook nog onder ston dat ter ies mit slagroom serveerd wuir, waren Derkie en ik verkocht. En ik mout zeggen: dou wie noa t noar binnenwaarken van n schnitzel as n deurmadde en n sorbet dij smuik asof joe der n engeltje over de tonge migt, soavends loat weer in huus waren, konden wie weerom kieken op n slim schiere en smoakvolle oavend.

Mor in de loop van de week is ons de lol der volkomen òfgoan. Kiek, as wie allìnt mor t Bokkeblad lezen zollen en nait t Nijsblad in de manne hadden mit Jans en Geertje, was der niks aan d’haand west. Mor op n oavend, net even veur Utopia aan, zat Geertje mit de neuze in t Nijsblad. As deur n ieme stoken schoot heur kop boven de kraande uut, en mit verwilderde ogen begon ze te reren as n swien dij mit de krulsteert tussen de klapdeure van de veewoagen klem zit.

’Wie binnen vergiftegd, ze hebben ons vergiftegd,’ ruip ze. En t duurde mor even of ik heurde t haile verhoal aan over n dioxine-schandoal. Normoal gesproken bin k nogal slim nuchter, mor dou k t reloas aanheurd haar, wuir mie t ook wat waik in de moage.

Noa t lezen is Derkie in t ìnde kommen en het zowat d’haalve kelder leeghoald en boudel votgooid. Zai wol dij rommelpot nait langer in huus hebben, loat stoan opeten.

Ik zat ter wat riddersloagen bie mor tougliekertied mos k aan t gebeuren denken. Want stel die nou toch ais veur dat wie t Nijsblad nait lezen haren en dat wie t allìnt mor mit t Bokkeblad deden. Din hadden wie de kipsatédobbeltjes uut de diepvries in de loop van de week vervast achter de knopen had. Wie haren din totoal gain wait had van de meugelke vergiftegensverschienseln dij meschain optreden kind haren. De rest van de week was din zörgeloos verlopen en wie hadden gain zenen in t lief had van benaauwdeghaid bie de gedachte dat binnenkört ons de koezen nait meer jeuken zollen. Nee, n leven mit bloots mor t Bokkeblad was toch n bult aangenoamer.

Derkies zuster Siene, was lestdoags nog even bie ons op veziede en wie hadden t ter nog even over. Over de wereld woarin wie leven en woarin wie overaal mit de dood bedraaigd worden. Of t nou n legionelloabakterie in ain van onze sportgelegenheden is of n vergiftegd hompke houndervlees bie de ploatselke slachter, overaal op dizze wereld wil joe de dood bie de poeperd griepen. Om van terrorisme mor te zwiegen. Mor ja, vluchten kinnen we nait en der binnen zoveul krachten dij ons verstand te boven goan. Krachten dij nait aaltied t beste mit ons veur hebben. Krachten dij teren op macht en geld.

“Dat geldt veur ons aalmoal,” zee Derkie nog. “Veur die-ook-Siene.” En dat was n woarhaid as n kou………

 
3 reacties

Geplaatst door op 8 oktober 2017 in Columns

 

3 Reacties op “Veur die ook, Siene

  1. fietszwerver

    8 oktober 2017 at 07:48

    ja we zijn ons leven nergens meer echt zeker

    Liked by 1 persoon

     

Geef een reactie

Vul je gegevens in of klik op een icoon om in te loggen.

WordPress.com logo

Je reageert onder je WordPress.com account. Log uit /  Bijwerken )

Google+ photo

Je reageert onder je Google+ account. Log uit /  Bijwerken )

Twitter-afbeelding

Je reageert onder je Twitter account. Log uit /  Bijwerken )

Facebook foto

Je reageert onder je Facebook account. Log uit /  Bijwerken )

Verbinden met %s

This site uses Akismet to reduce spam. Learn how your comment data is processed.

 
%d bloggers liken dit: