Tussen de regels deur

Ook dizze week bleek wel weer dat ter hail wat lu deur de rötten besnuvveld binnen, en wel zo slim, dat ze t “wat-kin-mie-t-volk-verröddekonten virus” oplopen hebben.

Zo was doar aine A v.d. S., n man van stand, dij in Paries even van La Vie genoot. Hai organizeerde n privékonsert in de rezidentsie van de Nederlandse ambassadeur en haar aan n stukje worst en keze nait genog om zien kennizzen te bevredegen. Der wer doarom n smak gemainschapsgeld tegen aan gooid, zodat elk zich doar volvreten kon, wat onder dat soort lu meer gewoonte as uutzundern schient te wezen.

Net as bie plietsietopper B. Dij ging zien bonnenboukje grondeg te boeten en wis op filaaine wieze de, op veurhaand kansloze reorganizoatsie bie de natsionoale plietsie, te manipuleren. Hai profileerde zich veuraal mit kwaliteiten as machtsmisbruuk en fraude plegen. Ook zien COR (ondernemensroad) was (en is) zo röt as n mispel. Soamen deden ze alles wat verboden was om de rötten aan t spek te holden.

En din was doar opains avvekoat A.B. dij bigamie legalizeren wil. Zo as bekend binnen rötten knoagdaaier en zokswat knagt inderdoad aan t gezonde verstand van n nuchtere grunneger. Hai motiveerde zien rötteghaid deur te zeggen dat t aans onder de radar gebeuren zol en dat je din nog verder van huus waren. Lu mit zoksoort gedachten kinnen inderdoad beter zo ver meugelk van ons huus wonen goan.

Mor t zgn. “plaskontrakt” sluig alles. Lu dij in n road van bestuur zitten van, in dit geval Careyn, leven as rötten in n duustere parallelle wereld. As je veur zoks belaaid verantwoordelk wezen duurven, din teun je n grode minachten noar elk dij òfhankelk is van de zörg dij je as instellen levern mouten. Dit soort lu zitten dudelk op t verkeerde stee. Zai binnen nait ains goud genog veur t beheer van n röddeklooster.

In alle gevallen bliekt dat de loag en loagen onder de top in röddevalen vastzitten. Angst regeert doar en zelden duurft aine de deksel van de doofpot te lichten. Ain dij dat wel dut wordt knipt en schoren.

Korrupsie en maffiapraktieken moaken ook van Nederland n verröt laand, woarin lu aan de top de baist uuthangen. t Wordt tied dat je dij baisten bie de noam nuimen…..

eltje ©