Maandelijks archief: december 2014

In vuur en vlam

image

n doavernde dunder
doalt draaigend deel
over stad en ommelaand

n gruin-geel-glìnne gloud
uut potten en pielen
verlicht klaai en zaand

deurdringende dreunen
doun lucht trillen
bie lichten en duusternis

legitimeerd wordt ter
mit vuur speuld
as of der gain mörgen meer is

eltje ©

Pokkeldefekten

Pokkeldefekten

appie was
stoapelgek op
en bezeten van licht-
en knaleffekten

dus foevelde hai
aal zien vuurwaark om
tot schiere
megaprojekten

mit sallegoaren
en paktaauw knuterde hai
d’ingewikkeldste
kunstobjekten

nou is zien leven
verknald en denkt hai
nait licht over
revalidoatsietrajekten

eltje ©

Ongezond

Zörgverzekern

in duusterdichte
ondeurdringboare bozzen
van zörgverzekeroars
dwoalen lu verdwoasd
en verloren rond

vertwieveld zuiken ze
dekken tegen gevoaren van
grof graaiende tentoakels
van t meedogeloos
monsterverbond

t is
t onhaail dat loert vanuut
ale houken en goaten

in n
schimmeg nevelwoud
van kosten en boaten

eltje ©