Archive for november, 2014

Redeloze roazernij

Zinloos geweld

Foto: dpa

 

echo’s van
stappen op stain
en luudruchteg gelal
van swaalkende schares
versteuren vraid en
raauw de rust

blikken binnen
genoadeloos
as woanzin wint
en gerechteghaid t
van verstandege
proat verlust

kreten van onmacht
verscheuren t duuster
en klinkers kleuren rood

weerloos angstswait
stroomt in d’ogen bie
de zoveulste zinloze dood

eltje ©

Hinderpoalkriteria

Hinderpaalcriteria

de moate
van de zörg
lees je votstopt
tussen de regels deur

net as bie n
bingorad bin
j’overleverd aan
getallen van willekeur

t is as dolen in
n jirresloot vol
kreupelholt en
stroekgewas

mit prikkeldroad
aan hinderpoalen
dij votzakken
in t moeras

eltje ©

Last(er) vanuut de raandstad

Laster aardgasbaten

n gezonde soamenleven
vindt zien bestoansrecht in
n zekere moate
van solidariteit

hoaks doarop staait de
wel-de-lusten mor
nait-de-lasten
raandstadmentaliteit

n profiteur is hai
dij parasiteert en t
solidariteitsprinsipe
ondergraft

dat bliekt veuraal as
n hond vanuut de
mieghommelnustkontraainen
blaft

eltje ©

2055 – Facts of life – 4

Fictie of werkelijkheid……?

Facts of life

2055 – Facts of life – 1
2055 – Facts of life – 2
2055 – Facts of life – 3

mit t injekteren
van stikstof hoalden
de nam en de stoat
t leste gas uut de grond

mor t gevoar van
stikstof was groot en
bleek veur leefboarhaid
slim ongezond

lamsloagen deur
teleurstellens ontston
der n klimoat van
wanhopege geloatenhaid

woardeur t wingewest
veraanderde in n
laandschop van vervaal en
verloatenhaid

eltje ©

Grunneger klanken

Grunneger klanken

Grunneger Klanken

 

GRUNNEGER KLANKEN – via Soundcloud

proat je
roeg en raauw
tegen n poedie
of n vraauw
din geef je wat
van joen karakter
bloot

zeg je
doedel of snokkel
en pìnze
of pokkel
din zeg je wat
wat joe loater
begroot

eltje ©

%d bloggers liken dit: