Archive for september, 2014

Burbach

Burbach

noast n graauw
en groeterg matras
ligt veurover n man
dij slachtovver is
van sadistische macht en
wellust

t in woord en
doad mishandeln en
vernedern deur
t verwonden van liggoam
en gaist gebeurt
bewust

winstbejag gaait
boven humaniteit en
internatsionoale konvìnsies
veur de rechten
van de mìns
worden schonden

t is de swaarde
schare van privatizeren
woar uut t leed
van slachtovvers
al meer verdainmodellen
ontstonden

eltje ©

Armageddon

Armageddon

twij werelden

woarvan d’ain konstant
in dezoloade stoat verkeert

omdat bie t doaglieks brood
misdoaden pleegd worden tegen
de mìnselkhaid

en

woar men in d’aander alles
òfbrekt en verhinneweert

omdat machten geldstromen
genereren dij z’onttrekken aan
de leefboarhaid

kollideren
en imploderen
in t swaartste gat

woarbie t
leste licht oplaait van
n eksploderend kruutvat

eltje ©

Bezopen

Bezopen

tussen middernacht en
t twijduuster kikt
fietsend nederland
de wereld aan veur
n doedelzak

ladderzat laverend
van riebel noar riebel
binnen loazerus en ko
op weg noar
n doodsmak

swaalkend en swierend
slingern ze van
geut noar geut

kennelek op weg
van nait nuchter noar
n bakkie leut

eltje ©

Stoatslötterij

Stoatslötterij

deksels
van beerputten
maskeren
de lucht
van lekken en t touvalleg
vernemen

aal wat
verborgen blift
verröt in
de stank
maank meer gemanipuleerde
problemen

t is funest en frustrerend as
n instantsie sjoemelnd en malverzerend
opereert en zien integriteit besmet

t is gain löt uut de lötterij as
balen in n duuster gat valen
zodat dit de transparantsie belet

eltje ©

%d bloggers liken dit: