Archive for augustus, 2014

Betrokkenhaid

Betrokkenhaid

Foto: AP

de rol van de
machtselite wordt zichtboar
as d’eerste doodskisten
in t twijduuster
groaven vullen

en de dood
slachtovvers òflevert van
filaaine missies dij
in n dikke dook
woarheden verhullen

eltje ©

Grunnens ontzet

Gronings ontzet

Tiedstieden leden heb k ooit ais n laid moakt over t Grunnens Ontzet. Tekst staait hieronder, t laid is doudestieds bie Radio Noord opnomen en zit doar in t archief. k Heb zulf gain flaauw idee meer hou t laid persies gaait.

STAD HUIL STAND

Zunne schoot heur felle stroalen tussen wolken deur,
Dij kwamen om dele, ruiken Stad en zetten dij in kleur.
Op dizze waarme julidag was t drok boven op de walen,
Bisschop van Munster draaigde eerdoags Stad binnen te valen.

Poorten dij tougang gaven tot Stad wuiren dou votdoadelk sloten,
Knoalen waren dou van levensbelang, dat haar elk dou wel schoten.
Veuraal t Raaitdaip was van pertansie, woapens en eterij
wuiren hierlangs aanvoerd uut t westen, doar waren ze nog vrij.

Vanòf Martinitoren zag men d’eerste ruters kommen.
Al gaauw verscheen der n tìntenkamp mit woapentuug en bommen.
Deure van d’Herepoort wuir aibels slim vernaild,
En menneg braandbom ruik binnen de stadswalen verzaild.
Mor……..

Refr.
Stad huil stand, gaf gain krimp, deurston t striedgewuil.
Stad was staark, dat gaf dou n soamheureghaidsgevuil.
Om Stad te nemen verschoot dou Berend menneg zwoare bom.
Dou stried streden was vertrok de vijand rad mit stille trom.

Grunnegers gaven dou gain kamp, zai huilen kop der veur.
Van Galens staarke legermacht kwam der din ook nait deur.
Auwerderzielster sluzen kwamen dou nait in vijands handen.
Dat was strategisch van belang veur Stad en Ommelanden.

Elke aanval van Bommen Berend was iederbod vergees.
Von Rabenhaupt was oppermachteg, aal wat doar op wees.
Grunnegers deden asmis n uutvaal in t vijandelk kamp.
Berend zien neuze was nait haard, wel rook hai kruut en damp.
Want……

Refraain.

In t leste koos dou Bommen Berend aaier veur zien geld.
Hai luit din ook de moudveren zakken en roemde dou t veld.
Op dizze mooi’augustesdag was d’òftocht vol in gang.
In Stad vierde elk groot feest, mit dans, meziek en zang.

Op t heden wordt d’òftocht van Van Galen aaltied nog herdocht.
Peerdekeuren, haarddroaverijen, en meziek nait uut de locht.
Op Grode Maarkt n kermis, woar hail wat lu veur kommen.
As òfsloeten n mieters vuurwaark, das symbolisch veur dij bommen.
Want……..

Refraain.

Tekst en meziek: Eltje Doddema

Mit aandere woorden: swaart

Swaart

Wie leven in n tied dat ter via allerhaande medioa veul bloot legd wordt, ook datgene woar je ainglieks totoal gain verlet van hebben. Mor omdat de mìns gain eerappel is, waarkt dij “emo-tv” mit veul non-infermoatsie op veul lu as n emootsionele vibroator. Zai worden bevredegd as aandere lu in geuren en kleuren heur haile hebben en holden bloot leggen en ze beleven hoogtepunten as der aine swaart moakt wordt.

– lees verder

%d bloggers liken dit: