Matchfixing
92 – 128; 85 – 117; 99 – 135…. In de perseneelskoamer vlogen getallen van links noar rechts over toavel. Ain van d’aanwezegen was drok dounde om aal dij getallen in te voeren in n tabel. Getallen, dij stonden veur d’onder- en bovendrok van t bloud van de patiënten. Doaglieks haar t personeel t drok mit t noteren van allerhaande weerdes en omdat je mit sievers meer doun kinnen as optellen en òftrekken was ain van de verpleegkundegen op t idee kommen om n gokspel te begunnen: t veurspellen van de blouddrok van patiënten.

Soms heb je van dij mementen dat joen leeftied joe parten speult en dat je veur n schietscheterghaid even ter observoatsie in t zaikenhuus opnomen worden. Zo belandde ik op ain van d’òfdailens van t UMCG, mor k haar as “lopend patiënt” ale tied om mie doar n dag of wat te vernuvern. Tussen t vouern en t tempereturen deur kon k mie vrij bewegen. Op ain van mien rondes heurde ik van “de blouddroklötterij”.

Vanwege mien vrije rol as patiënt baauwde ik makkelk kontakten op mit t personeel en deur de wat amikoale banden dij doardeur ontstonden wuir k nuigd om ook aan dij lötterij dail te nemen. Spelregels waren helder: elk legde € 10,– in en veurspelde de boven- en onderdrok van n zulf gekozen patiënt. Bepoalend waren de weerdes van de leste opmeetronde van de dag.

Ik haar as ainege de weerdes van vrouw Joager noteren loaten. t Ol mìns lag net n dag allìnd op n koamer en wos van veuren nait dat ze van achtern leefde. Elk moal weer vruig ze woar of ze was en as de verpleegkundege din zee dat ze in t zaikenhuus lag, was dat elk moal weer nijs veur heur. k Haar al even stiekem op heur patiëntenstoat keken wat of heur gemiddelde weerdes waren en haar dij in de tabel noteren loaten.

Net veur de leste meetronde zag k mien kans schoon. t Perseneel was aan t kovviedrinken, mor ik sloop de verschillende koamers in en brocht alle patiënten in onstuur. Vrouw Joager luit ik mit vree en t rezeltoat was der noar. Deur d’onverwachte konsternoatsie was de blouddrok van alle patiënten omhoog schoten, behaalve bie vrouw Joager. Dij haar d’haile oavend ongesteurd op heur koamer legen, mit as gevolg dat heur blouddrok normoal was. Zo wol t gebeuren dat ik de volgende dag mit € 360,– aan priezengeld op huus aanging. Gain ain wos van mien kraivelderij, van t manipuleren van rezeltoaten, in de sport ook wel bekend as “matchfixing”.

Nou denk ik dat ter Grunnegers binnen bie wel de griezel over de graauwel lopt as ze dit woord lezen. Dij binnen al drok dounde om veur “matchfixing” n “schier” Grunnegs woord te bedenken. n Gangboare dieverdoatsie, woarmit sommege streektoalgebrukers zich geern vernuvern.

n Kansloze missie, lu. t Is vergraimen van tied. Tied dij je veul zinvoller besteden kinnen. En mocht je nou vergrèld wezen omdat je joe aansproken vuilen, bedenk din dat wie woorden mit mekoar hebben. Woorden, das nou net woar t bie toal om gaait……. Schier toch?