Archive for maart, 2014

Nijs dichten

Nijs dichten
doaglieks
binnen der berichten
over strenge senzuren
deur kontrolerende machten

doaglieks
lees j’over regerens
dij d’invloud van media
medogenloos ontkrachten

òfwiekende mainens
worden nait
tolereerd

t benuimen van de realiteit
wordt nait
aksepteerd

t verspraaiden van infermoatsie
is deur grìnzen
nait te stoppen

veur ons binnen t
(veurlopeg nog?)
swaarde kraandekoppen

eltje ©

Sport keuren

Sport keuren
sport
wordt doaneg deur
kommersie beïnvloud
en t gaait nait bloots
om punten en tieden

kaptoal
manipuleert
de konsument dij aksepteert
dat bobo’s
schaive scheuvels rieden

t volk houst
gigantische bedroagen op
en dut dit zunder rankune

elke week weer
zit de massa massoal
drogeerd op de tribune

eltje ©

%d bloggers liken dit: