Maandelijks archief: oktober 2013

Aso-dörp

Aso-dörp
gries graauw
vol graffiti
stoan hekken
rond kontainers
woar lös van god
en gebod
fersoun gain doul is

in kulturen
woar “reken holden mit”
synoniem is
aan overlast
is der mit tolerantsie
jegens aandere gedroagens
fundementeel veul mis

doaglieks
worden weerden
mit vouten treden
en is gedrag abnormoal

lös
binnen de remmen
en klinkt de ghettoblaster
aldernoarst asosioal

eltje ©

Kleur bekennen

Kleur bekennen
de rooie droad
in n pienleke diskuzzie
is voak dat nait elk woord
op n goldschoaltje wogen is
en dat veul bekeken wer
deur gekleurde brillen

t wederzieds
swaart moaken
van de blinde dij
mit gruin en geel
veur d’ogen oordailde
was voak d’oorzoak
van veul kleurverschillen

nooit staait
swaart op wit
wat widde wieven brengen

mor nait elk
verstaait de kunst
kleuren harmonieus te mengen

eltje ©